CARITA PANTUN Mundinglaya di kusumah

Mundinglaya di kusumah Kacapi kidung pantun

astagfirulloh hal adzim
astagfirulloh hal adzim
astagfirulloh hal adzim
astagfirulloh hal adzim
opat puluh kali
astagfirulloh hal adzim

bul kukus nurun ka manggung
ka manggung ka sang rumuhun
ka batara ka batari
ka batara neda suka
ka batari neda suci
ka nu agung neda maap

kuring rek diajar ngidung
nya ngidung carita pantun
ngahudang dongeng baheula
lulurung tujuh ngabandung
kadalapan keur disorang
bok bilik nerus nurutus
bok bilik narajang alas
palias nerus nurutus
palias narajang alas

neda agung cukup lumur
neja jembar pangampura
ka sakur para lelembut
ka sakur para dedemit
ka sadaya neda pangampura
nyanggakeun pangabakti
babakti ka nu jauh
babakti ka nu deukeut

ka sakur para karuhun
ka sakur para raja
nu kacatur dina galur
nu kakocap na carita
bisi kasebat namina
bisi salah ngadongengna
bisi salah nyaritana
teu cocok jeung saenyana
kula neda pangampura
hung ahung
hung ahung
ka nu linuhung di manggung
ka anu murba wisesa
nu ngawasa bumi alam
kula nyanggakeun pangbakti

bubuka ieu carita
baheula behditueun baheula
dongeng didongengkeun deui
carita dicaritakeun deui
ti aki pindah ka bapa
ti bapa pindah ka anak
ti anak pindah ka incu
kitu jeung kitu bae tug ka kiwari

sakapeung jadi manjangan
sakapeung jadi mondokan
ditambahan dikurangan
disusurup sangkan payus
dipapaes sangkan beres
direumbeuy ku basa heureuy
diselapan ku puisi loka
kaselang jadi carita

urang gancangkeun carita
kocapkeun aya nagara
kacluk ka awun-awun
ka koncara mancanagara
nyaeta nagara Pajajaran
nagara sugih mukti
nagara aman santosa
sepi paling towong rampog
murah sandang murah pangan

ari anu jadi ratu
papayung nagara Pajajaran
jujuluk Prabu Siliwangi
ratu agung beurat beunghar
menak pete sing ratu rembesing kusuma
anu luhung budina
gede wibawana
ratu adil palamarta

ratu kagungan garwa teuing ku seueul
diantawisna anu jenengan Nyi Mas Padmawati
nu geulis kawanti-wanti endah kabina-bina
ratu asih kacida

tapi prameswari sejen aya nu sirik
teu weleh cemburuan jeung goreng hate
sarta neangan akal
sangkan Nyi Mas Padmawati nemahan pati

dina hiji dinten
Nyi Mas Padmawati unjukan ka ratu
yen mantena parantos ngimpen
ningali jimat dilangit
anu nelah Lalayang Salaka Domas
milikna Guriang Tujuh

dina salebet di ngimpen
anjeuna ngadangu aya suara eces pisan
“sing saha anu miboga eta jimat
bakal bagja turta jaya
sarta bisa dipake tumbal paripih
pek geura bareunangkeun….
pek geura bareunangkeun….”

barang ratu ngadangu
kasauran sang prameswari
anjeuna ngaraos heran
tapi percaya sarta kataji
lajeng nyalauran para putra
para ponggawa jeung mantri
miwarang milarian eta jimat
anu nelah Lalayang Salaka Domas
mun kapanggih gancang bawa

tapi sarerea heran sarerea bingung
teu aya saurang ge nu sanggup ngabuktoskeun
maranehna sareuri bari jeung silih rered
ah impian mah impian asa teu kudu digugu, ceunah….
langkung sae Nyi Mas Padmawati we sina neangan sorangan, ceunah….

kumargi raja kacida palai nami boga
lajeng Nyi Mas Padmawati kedah ngabuktoskeun
milari eta jimat keur raja
mun teu buktos bakal dihukum pati
sabab geus bohong ka nu jadi raja

atuh Nyimas Padmawati nangis ngaruk
bingung kasaha nya menta tulung
lajeng anjeuna emut ka nu janten putra
anu jenengan raden Mundinglaya Dikusumah
sugan sanggup ngabela nu jadi indung

lajeng bae Nyimas Padmawati nyaur lengser
Uwa lengser,
eh ieu uwa kaula nun
nuhun Uwa, kuring rek neda pitulung
pangangkirkeun anak kuring raden Mundinglaya Dikusumah,
hehe unjuk sumangga dunungan,
caritakeun ku andika sakumaha anu didawuhkeun ku ratu ka kuring,
hehehehe unjuk sumangga dunungan,
pangbejakeun kuring rek menta tulung
pangneangankeun jimat lalayang Salaka Domas
mun kapanggih kasik haturkeun ka ratu,
eh. unjuk sumangga. amit Uwa bade miang,
geura Uwa masing hasil maksud

berebet Uwa lengser lumpat tarikna kabina-bina
tarik batan mimis bedil gancang batan kuda lumpat

kocapkeun di hiji tempat
raden Mundinglaya Dikusumah
nuju calik bari jeung suka bungah
anjeuna teh hiji satriya nu utama
satia ka nagara jeung ibu rama
lengser teu lami anjog kadinya
bari eungap-eungapan bakating ku cape
sampura sun agan ieu Uwa nun,
eh bagea Uwa. mangga calik,
haturan agan haturan,
bagea uwa. aya naon siga nu rusuh,
e leres agan
uwa datang mawa beja. uwa diutus ku tuang ibu,
aya nu penting uwa? coba kuring bejaan,
e langkung ti penting agan. tuang ibu parantos ngimpen ningali jimat
anu nelah Lalayang Salaka Domas di langit
kumargi teu aya anu sangem ngabuktoskeun
nya tuang ibu kedah milarian
mun teu buktos bakal dihukum pati,
aduh aduh aduh aduh
atuh etamah bangga kacida Uwa
tapi keun bae. kaula bakal usaha ngabela nu jadi indung,
unjukeun,
keun etamah bagean kuring,
aduh nuhun agan. nuhun. tetela anjeun teh lalaki langit lalanang jagat.
mangga atuh urang enggal-enggal miang. tuang ibu parantos ngantos di karaton.

enggalna, raden Mundinglaya Dikusumah angkat
diiring ku lengser angkat muru karaton

indit tina pangcalikan, indit tina pangcalikan
lugay tina patempatan
adat menak, budi ludeung
ludeungnateh bari jeung teuneung, bari jeung teuneung
diiring ku Uwa lengser
leumpang bari heheotan, da heheotan
daun caringin nyalingray
katiup ku heot lengser, ku heot lengser

Dangukeun/ragapkeun video dihadapi: